20,23 தேதிகளில் விவாதம்! பாஜக தலைமையிலான மத்திய அரசு மீதான நம்பிக்கையில்லாத் தீர்மானம் ஏற்பு!

நாடாளுமன்ற மழைக்காலக் கூட்டத்தொடர் இன்று தொடங்கியது. ஆந்திர மாநிலத்துக்குச் சிறப்பு அந்தஸ்து வழங்குவதில் மத்திய அரசு ஏமாற்றிவிட்டதாகக் குற்றம் சாட்டி தேசிய ஜனநாயகக் கூட்டணியில் இருந்து தெலுங்கு தேசம் கட்சி விலகியது.

அதன்பின் கடந்த பட்ஜெட் கூட்டத்தொடரில் தெலங்கு தேசம் கட்சியினர் பெரும் அமளியில் ஈடுபட்டு ஆளும் மோடி அரசுக்கு எதிராக நம்பிக்கையில்லாத் தீர்மானத்துக்கு நோட்டீஸ் அளித்தனர். ஆனால் அதை மக்களவை சபாநாயகர் ஏற்கவில்லை.

இந்நிலையில், மழைக்காலக் கூட்டத்தொடரிலும் ஆளும் பாஜக அரசுக்கு எதிராக நம்பிக்கையில்லாத் தீர்மானத்தை தனிப்பட்ட முறையில் கொண்டு வர தெலுங்கு தேசம் கட்சி முடிவு செய்தது. அதேசமயம், காங்கிரஸ் கட்சியும் தனிப்பட்ட முறையில், நம்பிக்கையில்லாத் தீர்மானம் கொண்டுவர முடிவு செய்திருந்தது.

இதன்படி, தெலங்கு தேசம் கட்சி எம்.பி. கேசினேனி சீனிவாஸ் ஆளும் மோடி அரசுக்கு எதிராக நம்பிக்கையில்லாத் தீர்மானம் கொண்டுவரக் கோரி நோட்டீஸ் அளித்திருந்திருந்தார். அதே மக்களவை சபாநாயகர் சுமித்ரா மகாஜன் ஏற்றுக்கொள்வதாக அறிவித்தார்.

மக்களவை தொடங்கியதும் புதிய உறுப்பினர்கள் பதவி ஏற்றுக்கொண்டனர். அதைத் தொடர்ந்து அவைக்கு வந்திருந்த பிரதமர் மோடி, புதிய உறுப்பினர்களுக்கும், எம்.பி.க்களுக்கும் வாழ்த்து தெரிவித்தார். அவையில், காங்கிரஸ் தலைவர் ராகுல் காந்தி, மூத்த தலைவர் சோனியா காந்தி உள்ளிட்ட பலர் வந்திருந்தினர்.

அவையில், சபாயநாயகர் சுமித்ரா மகாஜன் கூறுகையில், ”தெலங்கு தேசம் கட்சியின் எம்.பி. கேசினேனி சீனிவாஸ் நம்பிக்கையில்லாத் தீர்மானம் கொண்டுவரக் கோரி அளித்த மனு முதலில் ஏற்கப்பட்டது. மொத்தம் 6 எம்.பி.க்கள் மனு அளித்துள்ளனர். சீனிவாஸ் இந்தத் தீர்மானத்தை முன்மொழிந்தால், 50 எம்.பி.க்கள் ஆதரவு அளிக்க வேண்டும்.

இந்த மனு ஏற்கப்பட்ட நிலையில், அது குறித்து விவாதம் நடத்த, நம்பிக்கை வாக்கெடுப்பு நடத்த 10 நாட்கள் வரை அவகாசம் உண்டு. மனு மீது விவாதம் நடத்துவது குறித்து அடுத்த சில நாட்களில் அறிவிக்கப்படும்” எனத் தெரிவித்தார்.

அப்போது நாடாளுமன்ற விவகாரத்துறை அமைச்சர் அனந்த் குமார் எழுந்து பேசுகையில், ”எதிர்க்கட்சிகள் கொண்டு வரும் நம்பிக்கையில்லாத் தீர்மானத்தை எதிர்கொள்ள மத்திய அரசு தயாராக இருக்கிறது. நம்பிக்கையில்லாத் தீர்மானத்தின் மீது விவாதம் நடத்தப்பட்டால் அனைத்தும் சரியாகிவிடும். பிரதமர் மோடி தலைமையிலான அரசு மீது மக்கள் மிகுந்த நம்பிக்கை வைத்துள்ளனர் என்பது தெளிவாகும்” என்று தெரிவித்தார்.

அப்போது குறுக்கிட்டுப் பேசிய காங்கிரஸ் தலைவர் மல்லிகார்ஜுன கார்கே, ”மற்ற உறுப்பினர்கள் அளித்த நம்பிக்கை இல்லாத் தீர்மான மனு ஏன் வாசிக்கப்படவில்லை” என்று கேள்வி எழுப்பினார்.

அதற்குப் பதில் அளித்த சபாநாயகர், ”முதலில் யார் தீர்மான மனுவை அளித்தார்களோ அவரின் பெயர்தான் வாசிக்கப்பட வேண்டும் என்பது மரபாகும். மற்ற உறுப்பினர்கள் கார்கே, கே.சி வேணுகோபால், தாரிக் அன்வர்(என்சிபி), என்.கே. பிரேமசந்திரன்(புரட்சிகர சோசலிஸ்ட் கட்சி), தோட்டா நரசிம்மன்(டிடிபி) ஆகியோரும் மனு அளித்துள்ளனர்” என்று தெரிவித்தார்.

பார்லி மழைக்கால கூட்டத் தொடரின் முதல் நாளான இன்று (ஜூலை 18), காங்., மற்றும் தெலுங்கு தேசம் கட்சிகள் மத்திய அரசுக்கு எதிராக நம்பிக்கையில்லா தீர்மானம் கொண்டு வந்தன. இதனை ஏற்பதாக சபாநாயகர் சுமித்ரா மகாஜன் அறிவித்துள்ளார்.

லோக்சபாவில் ஜூலை 20 ம் தேதியும், ராஜ்யசபாவில் ஜூலை 23 ம் தேதியும் நம்பிக்கையில்லா தீர்மானம் மீது விவாதம் நடைபெற உள்ளதாக தெரிவிக்கப்பட்டுள்ளது. இந்நிலையில் நம்பிக்கையில்லா தீர்மானம் மீது ஓட்டெடுப்பு நடத்தப்பட்டால் தங்களுக்கே போதிய பெரும்பான்மை உள்ளதாக காங்கிரசும், பா.ஜ.,வும் கூறி வருகின்றன. இது குறித்து காங்., முன்னாள் தலைவர் சோனியா கூறுகையில், நாங்கள் கொண்டு வந்துள்ள நம்பிக்கையில்லா தீர்மானத்திற்கு அதிக பெரும்பான்மை ஆதரவு கிடைக்கும் என்ற நம்பிக்கை உள்ளது. அதனால் நம்பிக்கை ஓட்டெடுப்பு பற்றி எங்களுக்கு கவலையில்லை என்றார்.

அரசு தரப்பில் வெளியிடப்பட்டுள்ள தகவலில், எங்களுக்கு பெரும்பான்மை உள்ளது. இந்த நம்பிக்கையில்லா தீர்மானத்தின் மூலம் எங்களின் சாதனைகளை நேரடியாக அவையில் வைக்க முடியும். பிரதமரும் பா.ஜ., அரசின் சாதனைகளை அவையில் பட்டியலிட உள்ளார் என தெரிவிக்கப்பட்டுள்ளது. பிரதமர் குறித்து எதிர்க்கட்சிகள் முன்வைக்கும் குற்றச்சாட்டுக்களை விவரிக்கவும் அரசு திட்டமிட்டுள்ளது.

535 உறுப்பினர்களை கொண்ட லோக்சபாவில் பா.ஜ., 273 உறுப்பினர்களை கொண்டுள்ளது. சிவசேனா உள்ளிட்ட கூட்டணி கட்சிகளின் ஆதரவுடன் சேர்த்து பா.ஜ.,வுக்கு 313 உறுப்பினர்களின் ஆதரவு உள்ளது. அதே சமயம் 37 உறுப்பினர்களை கொண்ட அதிமுக, 20 உறுப்பினர்களை கொண்ட பிஜூ ஜனதா தளம், 11 உறுப்பினர்களைக் கொண்ட தெலுங்கானா ராஷ்டிரிய சமிதி கட்சிகள் யாருக்கு ஆதரவு அளிக்கப் போகிறார்கள் என்பதை இதுவரை முடிவு செய்யவில்லை.